Gitakdang magpahigayon og 20 ka adlaw nga intensive training ang Zamboanga del Sur Delegation isip kabahin sa ilang pagpangandam alang sa umaabot nga Zamboanga Peninsula Regional Athletic Association kun ZPRAA Meet 2026 nga pagahimoon sa Isabela City, Basilan karong bulan sa Abril 2026.
Sa press conference bag-ohay pa lamang, gibutyag ni Ruel Fuerzas, Division Sports Coordinator, sa bulan sa Marso magsugod na ang training camp sa mga atleta aron ipailawom sa ensayo sa nagkalain-laing disiplina sa sports sama sa athletics, swimming, basketball, volleyball ug ubang pang-indibidwal sa sports event.
Segon pa ni Fuerzas, lakip usab sa programa ang physical conditioning, mental preparedness sessions, ug team-building activities aron mapalig-on ang kooperasyon sa matag atleta ug coaches.
Samtang mahimong dakong challenge karon ang kalig-on sa kaatbang nga delegasyon sama sa Zamboanga City, ingon man ang paghiusa sa Zamboanga del Norte, Dipolog City ug Dapitan City delegation.
Dugang sa opisyal, pinaagi sa maong preparasyon, makapakita og maayong performance ang Zamboanga del Sur delegation ug makadala og dungog sa probinsya, bisan paman lisod kab-oton ang overall champion sa maong kompetition.
