Arestado ang mokabat 43 ka indibidwal sa gipahugtan nga region-wide Simultaneous Anti-Criminality and Law Enforcement Operations (SACLEO) sa Surigao del Norte Police Provincial Office (SDNPPO), nga gipahigayon gikan Pebrero 10 hangtod 16, 2026, ubos sa pagpanguna ni PCOL Warren E. Dablo, Provincial Director.
Sumala sa Provincial Operations Unit (POU), 12 ka mga wanted person ang nadakpan sa 11 ka nagkalain-laing operasyon. Lakip niini ang usa ka most wanted sa regional level, duha sa provincial level, ug usa sa municipal level.
Sa kampanya batok sa ilegal nga droga, nakompiskar ang 17.63 gramos nga shabu nga adunay gibanabanang kantidad nga Php119,899.00. Unom ka mga suspek nga giila isip high-value ug street-level drug personalities ang nadakpan sa unom ka buy-bust operations.
Sa illegal nga pagpangisda diin 21 ka mga indibidwal ang nadakpan. Sa 17 ka operasyon, nakompiska ang 95 ka kilo nga nagkalain-laing klase sa isda nga nagkantidad og Php18,230.00.
Sa kampanya batok sa ilegal nga sugal, duha ka indibidwal ang nadakpan ug nakompiska ang mga paraphernalia nga nagkantidad og Php1,000.00 sa duha ka operasyon.
Samtang batok sa loose firearms, lima ka short firearms ang boluntaryong gitugyan sa kapulisan alang sa safekeeping pinaagi sa lima ka nagkalain-laing operasyon, isip kabahin sa pagpakunhod sa presensya sa ilegal nga armas sa komunidad.
Sa anti-illegal logging operation, nakompiska ang 104 board feet nga ilegal nga kahoy nga adunay gibanabanang kantidad nga Php1,040.00, ug duha ka indibidwal ang nadakpan kalabot niini.
Sa gipatuman nga lokal ordinansa, 19 ka operasyon ang gihimo diin 185 ka mga violator ang nasilotan ug nakolekta ang kinatibuk-ang multa nga Php44,050.00.
Matod ni PCOL Dablo, ang malampusong pagpatuman sa usa ka semana nga SACLEO nagpakita sa dedikasyon ug epektibong paningkamot sa kapulisan sa pagmintinar sa kalinaw ug kahapsay sa probinsya, ug iyang gidayeg ang aktibo nga operasyon samtang mapadayon ang maong kampanya batok kriminalidad.
Photo Courtesy: SDNPPO
