Gitunol ang wheelchair ngadto sa duha ka benepisyaryo ang local nga panggamhanan sa Kapalong isip kabahin sa padayon nga serbisyong sosyal alang sa mga Persons with Disability (PWD) ug senior citizens sa lungsod niadtong nakalabay nga adlaw.
Gipangulohan ni SB Member Ayette Timbol kauban ang mga personahe sa Municipal Social Welfare and Development Office (MSWDO) ang maong distribusyon aron matabangan ang mga benepisyaryo sa ilang adlaw-adlaw nga paglihok.
Nakadawat mao sila si Josefina Agmata, 79-anyos, residente sa Purok 2, Barangay Luna, ug si Ariel Gascon, 41-anyos, residente sa Purok 3 Relocation, Barangay Maniki, Kapalong, Davao del Norte. Sumala ni Timbol, ang inisyatibo kabahin sa paningkamot sa lokal nga panggamhanan sa pagpalapad sa serbisyo alang sa mga sektor nga nagkinahanglan og dugang nga suporta.
Gipasabot niya nga ang paghatag og assistive devices sama sa wheelchair dako og tabang aron mapadali ang paglihok ug mapauswag ang kalidad sa kinabuhi sa mga benepisyaryo. Gipahayag usab nga ang LGU Kapalong ubos sa liderato sa kasamtangan mayor, magpadayon sa pagpalig-on sa mga programa alang sa PWDs, senior citizens, ug uban pang vulnerable sectors pinaagi sa serbisyong sosyal ug community-based support programs.
Ang maong kalihokan nagpakita sa padayon nga pagpakabana sa lokal nga panggamhanan sa kaayohan sa tanang Kapalonganian.
PHOTO COURTESY : KAPALONG INFOCENTER
