Gibutyag ni Surigao del Sur Gov. Johnny Pimentel nga andam ang probinsya sa Surigao del Sur nga mo-import og bugas kung makita nga magkakulang ang suplay human sa epekto sa bagyo Basyang.
Sa iyang gihimong press conference, giingon sa gobernador nga sa pagkakaron wala pa klaro kung adunay kakulang sa supply sa bugas tungod kay nagpadayon pa ang assessment ug pagpatubo sa humay sa mga mag-uuma bisan paman sa pagkuso kuso ni bagyong basyang sa probinya. Dungang pa niya nga posibleng sa bulan sa Marso pa masuta kung pila gyud ang ani ug kung igo ba kini para sa panginahanglan sa katawhan sa suriago del sur.
Matud pa sa gobernador, kaniadto nakasuplay ang probinsya og kapin 120 ka metric tons nga bugas tungod sa maayong panahon ug maayong ani. Apan tungod sa bagyo nga nakaapekto sa pipila ka uma, gilauman sa lokal nga gobyerno nga dunay kakulangon sa suplay sa humay apan magandam matud pa ang probinsyal nga gobyerno aron masulusyonan kini.
Gipasalig ni Gobernador Pimentel nga buhaton sa probinsyal nga gobyerno ang tanang paagi aron masiguro nga adunay igo nga bugas ang mga katawhan ug malikayan ang pagsaka sa presyo aron dili maglisod ang mga residente sa Surigao del Sur.
