Gibutyag ni Surigao del Sur Governor Johnny Pimentel atol sa flag raising ceremony sa provincial capitol kagahapong adlawa ang makalilisang nga damyos nga gibilin sa Bagyong Basyang sa tibuok probinsya.
Sumala sa report sa Gobernador, ang kinatibuk-ang kantidad sa damyos miabot na sa Php1,580,190,000. Sa maong kantidad, ang sektor sa Infrastruktura ang nakasinati sa pinakadako nga guba nga mitala og Php929,270,000, samtang gisundan kini sa sektor sa Agrikultura nga duna’y danyos nga Php634,883,000.
Sa bahin sa kabalayan, mitala ang probinsya og 229 ka totally damaged houses ug 2,140 ka partially damaged houses. Gipahibalo ni Pimentel nga giproseso na sa gobyerno ang cash assistance para sa mga tag-iya sa mga balay nga hingpit nga naguba aron makasugod na sila sa pagpabalay og usab.
Lakip usab sa naapektuhan mao ang linya sa kuryente ilawom sa SurSeco nga duna’y damyos nga Php2,320,000, samtang mitala usab og Php3,458,000 ang damyos sa uban pang mga kabtangan ug assets sa probinsya.
Bisan pa sa kadako sa maong kantidad, padayon ang paningkamot sa kagamhanang probinsyal aron masiguro nga mahatagan og dinaliang serbisyo ang tanang naapektuhan sa kalamidad.
