Nasikop ang usa ka German national, sa mga awtoridad sa Ninoy Aquino International Airport (NAIA) Terminal 3, human nakuhaan og ilegal nga droga nga nagkantidad kapin sa Php60-million.
Sa report sa Philippine National Police (PNP), ang mga bagahe sa langyaw na-flag sa Customs International Arrival Area niadtong nakalabay nga adlaw.
Sa makuting pagsusi, nasuta nga kapin sa walo ka kilo sa gituohang shabu nga gisulod sa mini-compartment sa maleta sa suspek. Gidakop dayon ang langyaw ug nasakmit ang mga kontrabando.
Samtang, upat ka inbound parcels nga adunay sulod nga gibana-bana nga 3.8 kilos nga gidudahang marijuana nga gikan sa Thailand ug Canada ang nasakmit usab sa Central Mail Exchange Center, nga gi-turnover na sa Philippine Drug Enforcement Agency (PDEA).
Kasamtangang gisusi sa kapolisan ang posibleng koneksyon sa sindikato sa mga Probinsya sa Cavite, Kalinga, ug Pampanga. Gidayeg ni PNP Chief Police General Jose Melencio Nartatez ang malampuson nga operasyon dungan sa pagsiguro sa mas hugot nga pagbantay sa mga utlanan sa nasud.
Photo Courtesy: Customs.gov.ph
