Sa laing bahin sa kalibutan, usa ka baryo sa Sichuan, China, nakasinati og pagkapalong sa kuryent tungod sa baboy nga nilupad sa hangin.
Sumala sa report, usa ka mag-uuma ang nakahunahuna og “high-tech” nga paagi sa pagdala sa iyang mga baboy padulong sa ihawan. Imbes nga isakay og trak, iyang gihigot ang usa ka buhing baboy sa dako nga remote-controlled drone aron paluparon paingon sa slaughter house.
Apan sa unang byahe pa lang sa drone, nasangit kini sa high-voltage nga linya sa kuryente. Tungod niini, naputol ang suplay sa kuryente sa tibuok baryo, samtang ang baboy nagpabiling nagbitay sa kahanginan sulod sa pipila ka oras.
Napugos ang mag-uuma sa pagtawag sa power company aron masulbad ang problema. Mokabat sa dose ka tawo ang nanginahanglan ug labaw sa napulo ka oras aron mabalik ang kuryente, ug ang damyos miabot og kapin 10 mil yuan o mga kapin 70 mil pesos.
Sa imbestigasyon, napamatud-an nga nagpalupad siya og drone sa no-fly zone ug sobra pa gyud ang gibug-aton niini. Bisan pa niana, matod pa sa mag-uuma, lisod kaayo ang dalan sa bukid, ug ang drone unta ang makatabang aron maminusan ang oras ug gasto. Apan miresulta hinuon kini og kalangan og dakong gasto.
Mga kajuander, dili tanan nga sa imong paminaw nga sayon makapagaan sa imong kinabuhi, susiha kong kana ba makatabang kanimo og basin sa ulahi imong basolan ang imong mga desisyon.
Photo courtesy: Oddity Central
