Nagplano ang Department of the Interior and Local Government (DILG) nga mokuha ug mag-deploy og mga Lidar drones aron mapaspasan ang pagpangita sa mga high-profile fugitives sa nasud.
Sumala ni Interior Secretary Jonvic Remulla, ang Light Detection and Ranging o Lidar drones adunay abilidad nga masusi bisan ang mga lugar nga natabonan sa baga nga kahoy o canopy. Pinaagi niini, mas dali makit-an sa mga awtoridad ang mga target nga posibleng nagtago sa kalasangan o tago nga lugar.
Gilauman nga ideploy ang mga Lidar drones sulod sa mosunod nga pipila ka bulan isip kabahin sa pagpalig-on sa manhunt operations sa gobyerno. Dako ang gilaumang matabang niini sa pagpangita kang kanhi Bureau of Corrections chief Gerald Bantag ug negosyanteng si Charlie “Atong” Ang.
Apil usab sa plano sa DILG ang pagpangita sa ubang mga indibidwal nga posibleng kasuhan may kalabotan sa giingong mga kurapsyon sa flood control projects sa nasud.
Gituohang nagtago si Bantag sa Cordillera Administrative Region human siya malambigit isip giingong mastermind sa pagpatay ni radio broadcaster Percival “Percy” Lapid Mabasa niadtong 2022.
Samtang, padayon usab nga gisusi sa mga otoridad ang posibleng lugar nga gitaguan ni Ang sa Metro Manila, Central Luzon ug Calabarzon. Giakusahan siya nga nalambigit isip giingong utok sa pagdukot ug pagpatay sa 34 ka sabungero.
Photo Courtesy: YellowScan
