Gitugotan na sa estado sa Sao Paulo, Brazil ang paglubong sa mga binuhi nga hayop kauban sa ilang tag-iya sulod sa family graves, human gipasar ang balaod nga nag-ila sa “emosyonal nga bugkos” tali sa tawo ug sa ilang mga pet.
Sumala sa Pet Brasil Institute, ikatulo ang Brazil sa tibuok kalibotan nga adunay pinakadaghang populasyon sa binuhi, nga mokabat sa 160 milyones ka mga hayop, timailhan nga dako ang papel sa pets sa kinabuhi sa mga Brazilian.
Ang maong balaod giinspirar sa istorya ni Bob Coveiro, usa ka iro nga mipuyo sulod sa napulo ka tuig sa municipal cemetery diin gilubong ang iyang tag-iya. Sa dihang namatay si Bob niadtong 2021, gitugotan siyang ilubong tupad sa iyang amo, nga nakapadasig sa mga mambabalaod nga maghimo og opisyal nga regulasyon.
Gilauman nga pinaagi niini, mas maila ang bili sa mga pet isip kabahin sa pamilya ug matagaan og dignidad bisan hangtod sa kataposang pahulay.
Giingon sa lokal nga gobyerno nga adunay igong patakaran aron masiguro nga hapsay ug limpyo ang proseso sa paglubong sa mga hayop kauban sa ilang mga tag-iya.
