Nagpadayon ang paningkamot sa Provincial Youth Development Office (PYDO) sa Probinsya sa Bukidnon, inabagan sa Provincial Population and Development Office (PPDO), sa pagtabang ug paggiya sa mga kabataan aron malikayan ang teenage pregnancy ug mapakunhod ang kaso niini sa lalawigan.
Sa eksklusibong pakighinabi sa Juander Radyo Malaybalay, gipadayag ni Alejandro Dano Jr., Acting Youth Development Officer sa PYDO, nga pila na ka tuig nga nanguna ang Probinsya sa Bukidnon sa Rehiyon 10 sa gidaghanon sa kaso sa teenage pregnancy ug naapil usab sa mga probinsya sa nasud nga adunay taas nga natala.
Matod ni Dano, padayon nga ginabuhat sa ilang opisina ang mga youth-focused activities sama sa symposiums, school visitations, peer education, ug youth development sessions aron mapalalom ang kahibalo sa mga batan-on bahin sa responsableng pamatasan, relasyon, ug reproductive health. Dugang pa niya, gawas sa pagsaka sa teenage pregnancy, namatikdan usab ang pagtaas sa ubang mga isyu nga may kalabotan sa kabataan lakip na ang kaso sa HIV/AIDS, mental health concerns ug mga insidente sa suicidal tendencies.
Gipasabot usab sa opisyal nga importante ang papel sa pamilya ug komunidad sa paggiya sa kabataan, ilabina sa paghatag og saktong edukasyon, open communication, ug suporta aron mapanalipdan ang ilang kaugmaon.
Naglaum ang mga opisyal nga pinaagi sa padayon nga edukasyon ug youth engagement programs, hinay-hinay nga mokunhod ang teenage pregnancy ug uban pang suliranon nga giatubang sa kabataan sa Probinsya sa Bukidnon.
Photo Courtesy: PYDO
