Nag-withdraw og suplay sa bugas gikan sa National Food Authority (NFA) Bukidnon ang Department of Social Welfare and Development Region 7 (DSWD-7) aron gamiton sa food assistance ug ipang apod-apod sa mga pamilya nga naapektuhan sa kalamidad ug kabus nga sektor sa komunidad sa rehiyon.
Sa eksklusibong pakighinabi sa Juander Radyo Malaybalay, giingon ni Gleen D. Otoy, Information Officer sa NFA Bukidnon, nga nagpadayon ang ilang paghatag og suplay sa bugas ngadto sa rehiyon sukad pa sa milabayng tuig aron adunay magamit ang DSWD-7 sa pag-andam og food packs, ilabi na sa mga naigo sa kalamidad.
Dugang pa niya, niadtong miaging tuig nakahatag na ang NFA Bukidnon og 1,000 ka sako nga bugas ngadto sa maong ahensya. Samtang karong bulana, adunay nakuha nga 200 ka sako, apan target nilang madugangan kini hangtod 500 ka sako, gawas pa sa kuhaon nga suplay gikan sa Misamis Oriental.
Sumala sa ahensya, ipanghatag ang maong bugas pinaagi sa relief operations ug social welfare programs aron masiguro nga adunay igo nga pagkaon ang mga pamilyang nanginahanglan og tabang, ilabina kadtong naapektuhan sa nagkalain-laing kalamidad.
Kabahin kini sa koordinadong aksyon sa gobyerno aron mapalig-on ang food assistance ug masiguro ang hustong pag-abot sa ayuda sa mga benepisyaryo.
Gipahayag usab nga nagpadayon ang paningkamot sa gobyerno sa paghatag og patas ug angay nga serbisyo publiko, uban sa tumong nga maprotektahan ang kaayohan ug panginahanglan sa mga komunidad sa panahon sa kalisod
Photo Courtesy: NFA BUKIDNON
