Girekognisa sa Provincial Administrator ang mga nagkadaiyang departamento sa lokal nga pagamhanan sa probinsyal kapitol ning lalawigan sa Misamis Oriental tungod sa hiniusang pwersa batok sa bahad sa Bagyong Basyang sa miaging semana atol sa monday flag raising ceremony.
Gibutyag ni Misamis Oriental Provincial Administrator Roel Gayoso, nga nalipay kini sa gipakitang serbisyo sa mga kadagkoan sa departamento sama sa PSWDO, PDRRMO ug uban pa, nga taliwala sa Bagyong Basyang, ilang gipakita ang ilang presensya nga anaa aron sa pagtabang sa pagtunol sa mga hinabang sa mga apektadong pamilya sa pipila ka mga kalungsuran.
Gipasalamatan sab niini ang buhatan sa Provincial Disaster Risk Reduction Management Office tungod sa kanunay nga pagmonitor sa palibot sa probinsya ug paghatag og direktiba sa MDRRMO aron masiguro ang kaluwasan sa mga misamisnon sa bisan unsang kalamidad.
