Gibutyag sa kadumalahan sa Iligan City Environment and Natural Resources Office (ICENRO) ang ilang determinadong pag-atubang sa problema sa basura sa syudad sa Iligan, diin ilang gihimo ang tin-aw ug detalyado nga plano aron masulbad kini.
Sumala sa Deputized Ecology Officer ug Deputized DENR-ENRO sa Iligan City Environment Office nga si Juris Doctor Maria Estella Bramida, mibutyag nga ang primary focus sa buhatan mao ang paghatag og husto ug klarong pahimangno sa publiko, nga angay magsugod sa balay sa matag residente ang saktong segregation sa mga basura.
Matod pa ni Bramida, ang matag pamilya kinahanglan mag-andam og upat o lima ka sako alang sa basura kung asa Ilahi-lahi ang, Dili malata nga basura, plastic nga gibutang sa cellophane, puthaw o metal, Botelya ug mga lata.
Gipasabot pa ni Bramida nga ang kasamtangang problema sa basura usa sa nag-unang hinungdan mao ang daghang kabarangayan nga wala nagtuman sa proper segregation.
Dugang niya, ang punong barangay adunay dakong responsibilidad sa pag-edukar sa katawhan sa waste management, paghatag og saktong silot, o pagpatuman sa multa ug paglimpyo sa komunidad, sumala sa balaod.
Ang ICENRO nagpahimangno nga ang maayong pamatasan sa pag-segregate sa basura magsugod sa matag panimalay, ug ang tinuod nga kalimpyo sa siyudad magsalig sa kooperasyon sa tanan.
