Mipahayag og dakong kabalaka ang Cagayan de Oro City Mayor, kinsa nanghinaot sa tanang barangay officials nga magtinud-anay sa pagtuman sa Republic Act 9003 o ang Ecological Solid Waste Management Act, ug dili na maghulat pa nga makasuhan tungod sa kakulangan sa hustong pagdumala sa basura.
Kini nga pahimangno gisulti sa mayor atol sa flag-raising ceremony nga gipangunahan niya sa City Hall Quadrangle, nga gitambongan sa mga opisyales ug kawani sa lokal nga panggobyerno sa Cagayan de Oro City.
Gipasabot ni Mayor Klarex nga dili niya gusto nga moabot pa sa punto nga ang mga barangay officials makasuhan tungod sa improper solid waste management, ilabi na sa dili pagtuman sa mga giya ug regulasyon nga gilatid sa balaod. Tungod niini, iyang gihangyo ang tanang barangay nga seryosohon ang implementasyon sa waste segregation, regular collection, ug ang hustong pagdumala sa basura sa ilang tagsa-tagsa ka komunidad.
Dugang pa sa opisyal, bisan pa man og dili sayon ang obligasyon nga gikinahanglan sa RA 9003, kini usa ka responsibilidad nga angay tumanon alang sa kaayohan sa katawhan ug sa pagpanalipod sa kinaiyahan. Iyang giila nga dako ang papel sa barangay sa kalampusan sa solid waste management tungod kay sila ang pinakaduol nga liderato sa komunidad.
