Gikompirma ni Cagayan de Oro City Mayor Rolando “Klarex” Uy nga ipatuman ang dry run sa “No Left Turn” policy sa Masterson Avenue sa Uptown, Cagayan de Oro City karong Huwebes, Pebrero 5.
Sa iyang mensahe atol sa monthly flag raising ceremony, giingon sa mayor nga tumong sa dry run ang pagsulbad sa grabeng traffic congestion sa dalan, ilabina sa oras sa kasab-an sa buntag ug hapon. Ang Masterson Avenue usa sa pinaka-abalahan nga dalan sa Uptown tungod sa kadaghan sa mga establisemento, eskwelahan, opisina, ug mga residential areas.
Sumala sa city government, ang “No Left Turn” policy magpasabot nga dili na tugutan ang mga sakyanan nga moliko pakaliwa sa pipila ka critical intersections sa Masterson Avenue, aron mas hapsay ang dagan sa trapiko ug malikayan ang pagbara sa karsada.
Kung magmalampuson ang dry run, posibleng ipatuman sa permanenteng paagi ang “No Left Turn” policy isip kabahin sa dugayng solusyon sa problema sa trapiko sa nahisgutang bahin sa syudad.
Photo courtesy: Cagayan de Oro City Information Office
