Gi-ambush ug gipaulanan sa mga bala ang Mayor sa lungsod sa Barobo nga si Ronito L. Martizano, 60-anyos, alas-4:10 sa hapon, Pebrero 3, 2026 sa Barangay Dughan, Barobo, Surigao del Sur.
Sumala sa inisyal nga report, sakay si Mayor Martizano sa usa ka Toyota Hi Ace gikan sa Sitio Panaraga, Barangay Gamut, Barobo, padulong sa Barobo proper dihang kalit siyang gibabagan sa usa ka abuhon nga Toyota. Mikanaog gikan sa maong sakyanan ang mga wala mailhi nga suspetsado ug gipusil sa makadaghang higayon ang sakyanan sa mayor gamit ang wala pa mailhing klase sa armas.
Human sa pamusil, paspas nga misibat ang mga suspetsado padulong sa direksyon sa San Francisco, Agusan del Sur. Ang insidente gitaho alas-4:20 sa hapon ug miresponde ang kapulisan alas-4:25 sa hapon. Nadala dayon sa ospital si Mayor Martizano aron matagaan og medikal nga atensyon.
Sa pagkakaron, anaa na sa stable nga kahimtangan karon si Mayor Martizano human maigo sa bala sa iyang abaga kauban sa iyang escort nga si PFC Khevin Mark Claridad, 29-anyos, sakop sa 67th Infantry Battalion sa Philippine Army ug residente sa Polomolok, South Cotabato.
Samtang nailhan na kaniadto si Mayor Martizano nga aktibong tigpanalipod sa kinaiyahan ug aktibong nagsulong sa pagpahunong sa iligal mining sa maong lungsod, usa usab kin isa gitun-an sa mga otoridad nga posibleng anggulo sa pagplanong pagpatay sa maong mayor.
Mahinumduman nga sa usa ka okasyon nga giapilan sa mayor, iyang giklaro nga hugot iyang baruganan sa pakigbatok sa iligal mining sa mga kasubaan aron ma preserba ang kina-iyahan.
Nagpagawas ug official statement ang Surigao del Sur Provincial Police Office (SDSPPO) pinanguluhan ni PCOL Jeffery Lawrence Mauricio, Provincial Director diin matud pa ni Mauricio, nga human sa maong insidente, opisyal nang gi-activate ang Special Investigation Task Group (SITG) Martizano aron manguna sa imbestigasyon. Adunay na usab Person of Interest (POI) nga ginamonitor ug ginavalidate karon samtang padayon ang pagtipon og ebidensya ug ang pagpangita sa mga responsable sa krimen.
Photo courtesy: McRonz
