Saulogon karong bulan sa Pebrero ang National Arts Month 2026 subay sa Presidential Proclamation No. 683, s. 1991 nga nagdeklara niini aron ilhon ang dakong papel sa arte sa pagpalambo sa kultura ug pag-ila sa Pilipinas isip usa ka nasud.
Giila sa lungsod sa New Corella probinsya sa Davao del Norte ang maong tinuig nga programa, alang sa karon nga tuig, diin gidalit ang tema nga “Ani ng Sining: Katotohanan at Giting” nga nagtumong sa paghatag og kahigayonan sa mga Pilipino sa pagpahayag sa tinuod nilang kasinatian, pagtindog sa mga prinsipyo, ug pagpreserba sa mga sugilanon nga naghulma sa nasud gikan sa nagkalain-laing henerasyon.
Sumala sa mensahe sa mga tigpasiugda, ang arte isip pahayag sa kamatuoran ug kaisog mahimong tuboran sa paglaum ug giya padulong sa mas matarong ug mauswagong katilingban.
Kahinumduman, bag-ohay lang nagkahiusa ang mga kawani sa munisipalidad sa New Corella sa usa ka clean-up drive subay sa pag-obserbar sa Zero Waste Month niadtong milabay’ng sa bulan sa Enero, ug andam na sab ang ilang kabataan sa pag-ila sa sining ug kultura pinaagi sa gihan-ay niini nga mga aktibidad karong bulan sa Pebrero.
Photo Courtesy: BAYAN NG NEW CORELLA
