Nakadawat og tabang ang 23 ka pamilya nga naapektuhan sa sunog sa Barangay Dagocdoc, Dakbayan sa Tandag, human giapod-apod ang mga donasyon ug ayuda gikan sa nagkalain-laing ahensya, nga gipangulohan sa City Government of Tandag ilalom sa pagpanguna ni Mayor Roxanne Pimentel.
Ang mga donasyon pormal nga gitunol ngadto sa mga biktima sa sunog atol sa usa ka programa nga gipahigayon sa Barangay Dagocdoc Covered Court. Lakip sa mga nakadawat ang mga boarder ug renter nga naapil sa insidente.
Sumala sa report, ang mga pamilya nakadawat og financial assistance nga nagkantidad og ₱10,000 hangtod ₱30,000, base sa gidak-on sa kadaot sa ilang kabtangan.
Gipang-apod-apod usab ang mga food packs, hygiene kits, ug family kits nga gipanghatag sa Tandag City Government, DSWD Caraga, ug Opisina sa Bise Presidente aron matabangan ang mga apektadong pamilya sa ilang panginahanglan karon nga panahon.
Nagpasalamat usab ang 23 ka pamilya sa tanang naghatag og donasyon ug tabang, nga dako kaayo og kahulugan alang kanila samtang nagsugod sila pag-usab sa pag-atubang sa bag-ong hagit sa ilang kinabuhi.
