Nakig-kolaborasyon ang Provincial Government of Bukidnon sa UK Government’s Growth Gateway Programme, nga gipasiugdahan sa Boston Consulting Group (BCG), sa usa ka inisyatiba nga nagtumong sa pagpalig-on sa climate adaptation sa probinsya, partikular sa sektor sa agrikultura.
Sumala ni Governor Rogelio Neil Roque, ang kolaborasyon nagpunting sa pag-umol ug localized climate analytics aron masuportahan ang mga lokal nga mag-uuma ug mapalambo ang resiliency sa probinsya batok sa epekto sa climate change isip kabahin sa priority programs sa gobernador ilawom sa iyang 5-point agenda, nga naglakip sa Robust Local Economy and Agricultural Productivity.
“Ang pagpananum sa kape usa sa among gipunting tungod kay kini makapugong sa soil erosion sa kabukiran samtang naghatag usab ug malinawon ug sustainable nga panginabuhian sa mga mag-uuma,” matud pa ni Governor Roque sa iyang pahayag.
Gisugyot usab sa UK Government ang ilang suporta alang sa Philippine National Adaptation Program, diin gilatid ang nasudnong roadmap sa climate resilience.
Ang proyekto giila nga dakong lakang padulong sa mas lig-on ug mas sustainable Bukidnon, nga nagtan-aw sa long-term benefits sa ekonomiya ug kinaiyahan.
Photo Courtesy: LGU BUKIDNON
