Wala na kaikyas pa sa mga otoridad ang usa ka babaye human nga nadakpan sa gikasang buy bust operation didto sa Barangay Central, Mati City, Davao Oriental niadtong Enero 29, 2026.
Ang operasyon gihimo sa mga personahe sa Davao Oriental Provincial Police Office (DOPPO), Provincial Mobile Force Company, Regional Intelligence Unit, PDEA ug sa Mati City Police Station nga nagresulta sa pagkasikop ni alyas “Bulao” nga gikonsiderang High Value Individual (HVI).
Nakuha gikan sa suspetsado ang pipila ka pakete sa gituohang shabu nga gibana banaang adunay standard drug price nga Php 340,000.00. Lakip usab sa nasakmit ang usa ka Php1,000 peso bill nga gigamit isip buy bust money ug usa ka kaha sa sigarilyo.
Ang mga nakumpiskang mga ebidensya gimarkahan ug giimbentaryo sa lugar sa panghitabo nga anaa ang presensya sa mga testigo ug sa suspek mismo.
Sa kasamtangan ang dinakpan gikustodiya na sa Mati City Police Station alang sa tukmang disposisyon ug mag atubang sa kasong paglapas sa RA 9165 (Comprehensive Dangerous Drugs Act of 2002).
Photo Courtesy:Mati City Police Station
