Padayon ang hiniusang programa sa Highway Patrol Group (HPG), Land Transportation Office (LTO), Local Government Units (LGUs), ug uban pang partner nga ahensya sa gobyerno aron palig-onon ang implementasyon sa mga balaod trapiko, ilabi na batok sa carnapping ug sa hugot nga pagpatuman sa Republic Act 4136, o ang Land Transportation and Traffic Code.
Atol sa pagbisita ni PCOL Roel R. Sermese, Regional Chief sa Regional Highway Patrol Unit-10, sa opisina ni Governor Rogelio Roque, iyang gipadayag nga usa sa ilang nasabutan mao ang pag-conduct og mga orientation ug information drive kabahin sa mga balaod trapiko.
Sumala ni PCOL Sermese, ipunting sa maong mga aktibidad ang mga kabarangayan aron masabtan sa katawhan ang hustong pagpanag-iya ug paggamit sa sakyanan, paglikay sa carnapping, ug pagsunod sa regulasyon sa dalan.
Gilauman nga pinaagi sa maong orientation ug padayong paningkamot sa nagkadaiyang ahensya sa gobyerno, mapalambo ang kahibalo sa publiko, mapaligon ang disiplina sa kalsada, ug masiguro ang kaluwasan sa matag motorista ug lumulupyo sa tibuok probinsya sa Bukidnon.
Ang maong programa kabahin sa mas lapad nga inisyatiba sa gobyerno aron mapadayon ang malinawon, hapsay, ug luwas nga trapiko alang sa tanang motorista ug residente.
Photo Courtesy:HPG-10
