Gitun-an karon sa lokal nga pangagamhanan sa Lantapan ang plano sa pagmugna og usa ka bag-ong festival nga gilauman nga mahimong usa ka dakong kalihokan sa munisipyo sa umaabot.
Sumala ni Samuel A. Banda ang Tuorism Operation Officer l sa Lantapan Tourism Office sa pakighinabi sa Juander Radyo Malaybalay, ang maong festival wala pa’y opisyal nga pangalan sa pagkakaron, ug gipaabot nga si Mayor Ricky James Balansag mismo ang maghukom ug magmugna sa ngalan niini sa higayon nga mahuman ang konsultasyon ug pagplano.
Gipadayag usab nga posible nga ang umaabot nga festival adunay pagkapareho o similarities sa mga festival nga ginabuhat sa ubang syudad ug munisipyo sa probinsya sa Bukidnon, lakip na ang Kaamulan Festival, ilabi na sa aspeto sa pagpakita sa kultura, tradisyon, ug katahum sa lokal nga komunidad.
Bisan pa niini, giklaro sa lokal nga pangagamhanan nga ang tanan anaa pa sa yugto sa plano ug wala pa kini pormal nga na-finalize, lakip na ang petsa, tema, ug mga kalihokan nga ilakip sa maong festival.
Gilauman nga sa umaabot nga mga bulan, ipahibalo sa publiko ang dugang detalye kon ang maong plano mahimong hingpit nga matuman, nga gilauman usab nga makatabang sa pagpalambo sa turismo, kultura, ug lokal nga ekonomiya sa Lantapan, Bukidnon
Photo Courtesy:LGU LANTAPAN
