Nakumpiska sa kapulisan ang tag-as nga kalibre sa armas gikan sa usa ka 37-anyos nga indibidwal atol sa search warrant operation nga gikasa sa may Purok Sta. Cruz, Barangay Upper Libertad, Aurora, Zamboanga del Sur, kagahapong adlawa, Enero 28, 2026.
Bitbit sa mga personahe sa Zamboanga del Sur Provincial Intelligence Unit sa koordinasyon sa RDEU9-ZDS, RID9 , 902nd MC RMFB9, ug Aurora Municipal Police Station ang search warrant nga gi-isyu sa RTC 9, Branch 30, Aurora, Zamboanga del Sur, pinetsahan niadtong Enero 26, 2026.
Gi-serve sa kapulisan ngadto sa suspetsado ang search warrant may kalabutan sa Comprehensive Firearms and Ammunition Regulation Act (RA 10591) ug Comprehensive Dangerous Drugs Act of 2002 (RA 9165).
Nakumpiska atol sa operasyon ang lain-laing klase sa armas nga gilangkuban sa KG9 9mm caliber sub-machine gun nga adunay usa ka magazine ug 14 ka live 9mm rounds, usa Colt MK IV caliber. 45 pistol chamber loaded sa upat ka live rounds ug magazine, .45 caliber. 357 revolver loaded sa lima ka live rounds, ug ang gas-operated rifle.
Dugang nga nakumpiska gikan sa dinakpan ang 4 mga plastic sachet sa gituohang shabu.
Ang suspetsado nga ex convict una nang nadakpan gumikan sa paghimo ug salaod may kalabutan sa pagsupak sa RA 9165 ug kasamtangan nga gimonitor nga nalambigit sa managsunod nga pagpamusil sa lugar.
Ang nadakpan nga indibidwal lakip ang tanang mga nabawi nga mga butang gidala na sa Aurora Municipal Police Station alang sa dokumentasyon ug tulkmang lakang.
Photo Courtesy: PD ZSPPO, PRO 9
