Hugot na nga ipatuman syudad sa Malaybalay ang City Ordinance No. 900 nga nagdili sa paggamit sa bora-bora nga mga tambutso ug walay awtorisadong modification sa mga motorsiklo ug uban pang sakyanan.
Ang maong lakang gitumong aron matubag ang nagkadaghang reklamo sa katawhan may kalabotan sa sobrang kasaba sa tambutso nga makasamok sa pagkatulog sa mga residente. Apil usab niini ang pagdumala sa paggamit sa sulaw ug sobrang kahayag nga suga sa kagabhion nga posibleng hinungdan sa disgrasya sa dalan.
Sumala ni Lymrick C. Oro, Traffic Officer II sa Traffic Management Center (TMC) sa Malaybalay, ipahigayon ang joint operations tali sa TMC, Philippine National Police , ug Land Transportation Office sa Malaybalay aron mas epektibong ipatuman ang maong balaod
Partikular nga tutukan sa operasyon ang Section 21 o Miscellaneous Prohibitions sa ordinansa nga nagdili sa paggamit sa open pipe nga muffler, sobra ka kusog ug sulaw nga mga suga, ingon man ang ilegal nga body ug accessory modification sa mga sakyanan nga makapahasol ug makahatag delikado sa mga motorista ug residente.
Giawhag sa kagamhanan sa syudad ang publiko nga motuman sa balaod aron mapadayon ang kalinaw ug kaluwasan sa dalan, ug aron mapanalipdan ang kaayohan sa tanang katawhan.
Photo Courtesy: TMC Malaybalay City
