Gipadayag ni Iligan City Mayor Frederick Siao nga nag-andam na ang lokal nga pangagamhanan og tulo hangtod lima ka ektaryang yuta nga kabutangan og usa ka General Hospital sa dakbayan sa Iligan.
Sumala sa mayor, giandam na daan ang maong yuta human sa iyang pakigpulong kang JL Vanguardia, DOH–Iligan Head, ug kang Dr. Myra Luminarias sa DOH Center for Health Development–Northern Mindanao.
Dinhi nasayran nga dili na kinahanglan og Republic Act alang sa pagtukod sa maong ospital.
Gihangyo usab ni Mayor Siao ang suporta ni Dr. Sulpicio Henry M. Legaspi Jr., Regional Director sa DOH–CHD Northern Mindanao, nga mipasalig nga i-endorso ang proyekto aron mapadali ang proseso.
Ang lakang sa LGU tubag sa nagkadaghan nga pasyente sa Gregorio T. Lluch Memorial Hospital ug sa panginahanglan nga mapalapdan ang serbisyo panglawas sa syudad.
Matod pa sa mayor, giuna karon ang General Hospital tungod kay mao kini ang pinakaunang panginahanglan sa katawhan. Ang pag-gahin og yuta alang sa ospital, sumala pa niya, nagpakita sa tinuod nga paningkamot ug dedikasyon sa lokal nga pangagamhanan sa pagdugang og pasilidad sa panglawas sa Iligan.
Samtang dugang niini, anaa usab sa Kongreso ang House Bill nga gisugyot ni Lone District Congressman Celso Regencia alang sa pagtukod sa Iligan Regional Medical Center. Apan, wala pa kini maaprobahan sa duha ka Balay Balauranan.
