Mapasalamaton ang Public Service Division sa Syudad sa Iligan sa nahimong kahimtang sa pagdumala sa basura niadtong tuig 2025, bisan pa man sa mga hagit nga ilang giatubang.
Sa eksklusibong pakighinabi sa Juander Radyo News Team, gipadayag sa buhatan nga ilang nakita nga adunay kalamboan sa kahimtang sa kalimpyo sa dakbayan.
Sumala ni Aldwin Cabornay, hepe sa Public Service Division, dako ang iyang pasalamat sa mga barangay, sa kinatibuk-ang katawhan, ug sa pamunuan sa syudad ilabi na kang Mayor Frederick Siao, tungod sa ilang paningkamot sa pagpangita og mga pamaagi aron masulbad ang problema sa basura.
Matod pa ni Cabornay, pinaagi sa panaghiusa ug kooperasyon, mikunhod ang gidaghanon sa basura sa dakbayan. Apan gibutyag usab niya nga adunay mga higayon nga gihatagan og show cause order ang pipila ka barangay opisyal tungod sa kakulangon sa pagpatuman sa responsibilidad.
Giingon niya nga gikinahanglan nga ipatuman ang balaod aron masabtan sa tanan ang ilang katungdanan isip mga opisyal sa barangay.
Sa katapusan, nangayo og pasensiya ang PSD sa katawhan tungod sa pipila ka insidente nga dili dayon makolekta ang basura.
Kini, sumala pa, tungod sa kakulangon sa resources, pagkadaot sa mga kagamitan, ug limitadong manpower sa pipila ka higayon.
