Aron mapalig-on ang panag-partner sa mga lokal nga pangagamhanan alang sa kaayohan sa mga Overseas Filipino Workers (OFW), gipangulohan ni OIC Regional Director Emmanuel G. Toledo ang Department of Migrant Workers (DMW) Region X sa usa ka courtesy visit kang Bukidnon Governor Rogelio Neil P. Roque niadtong milabayng adlaw.
Mitambong usab sa maong tigum ang LGU Malaybalay, nga girepresentahan ni City Administrator Atty. Anna Marie R. Bergado, diin gihisgutan ang posibleng mga kolaborasyon nga nagtumong sa pagpalambo sa mga programa ug serbisyo alang sa mga OFW ug ilang mga pamilya sa tibuok probinsya.
Usa sa mga gipasiugda sa panaghisgot mao ang pagtukod sa bag-ong DMW Bukidnon Provincial Office, nga maghatag og mas sayon ug duol nga access sa mga serbisyo sa DMW alang sa mga OFW ug ilang mga pamilya. Gilauman nga kini makatabang sa mas episyente nga paghatod sa mga programa sama sa welfare assistance, pagpanalipod sa katungod sa mga migrant workers, ug reintegration programs.
Sumala sa DMW–X, ang panaghiusa tali sa ahensya ug sa Provincial Government of Bukidnon nagpakita sa komon nga tumong sa pag-atiman, pagpanalipod, ug pagpalig-on sa kahimtangan sa mga OFW nga dakong bahin sa pag-uswag sa nasod.
Photo Courtesy:LGU- Malaybalay City
