Giklaro sa Bureau of Customs (BoC) nga ang mga halin ngadto sa mga domestic market enterprises pagatrataron na isip mga lokal nga transaksyon. Tungod niini, ang pagdumala alang sa Value-Added Tax (VAT) ibalhin na ngadto sa Bureau of Internal Revenue (BIR).
Subay sa memorandum circular, ang mga halin sa mga produkto ug serbisyo ngadto sa mga domestic market enterprises o mga non-Registered Business Enterprises (RBEs) giila na karon isip ‘local sales.’ Kini wala na ubos sa mando sa BOC, ug anaa na karon sa hurisdiksyon sa BIR.
Ang kabag-ohan nagsunod sa Revenue Regulations No. 009-2025, nga naglatid sa mga lagda sa pagpatuman sa mga probisyon sa Corporate Recovery and Tax Incentives for Enterprises to Maximize Opportunities for Reinvigorating the Economy (CREATE MORE) Act.
Gipirmahan ni Presidente Ferdinand R. Marcos Jr. ang CREATE MORE Act niadtong 2024, diin mas gipamenos pa ang corporate income tax ngadto sa 20% gikan sa 25% alang sa mga RBE.
Ang mga RBE ang mga indibidwal o kompanya nga narehistro sa usa ka Investment Promotion Agency ug kwalipikado alang sa espesyal nga mga insentibo sa buhis, ilabi na kadtong mga negosyo nga nakatutok sa export o kadtong mga mahinungdanong lokal nga patigayon.
Photo courtesy: Business World
