Liboan ka mga tawo sa Denmark ug Greenland ang nagprotesta aron supakon ang sugyot ni U.S. President Donald Trump nga paliton ang Greenland gikan sa Denmark, ug gipaniguro nga ang Arctic territory mismo ang angay magdesisyon alang sa kaugalingon niining ugma sa damlag.
Sa Copenhagen, nagmartsa ang mga demonstrador padulong sa US embassy, samtang nagsinggit og “Greenland is not for sale” ug nagdala og mga banner nga nag-ingon nga “No means No” ug “Hands off Greenland”, uban ang pula ug puti nga bandera sa teritoryo.
Duna usab pipila nga nagsul-ob og pula nga baseball caps nga susama sa “Make America Great Again” ni Trump, apan ang nakasulat ang mga pulong nga “Make America Go Away.”
Gibanabana nga kapin sa 20,000 ka tawo ang nitambong sa protesta sa Copenhagen—halos katumbas sa populasyon sa kapital sa Greenland nga Nuuk—samtang duna usab mas gagmay nga mga protesta sa ubang bahin sa Denmark.
Sa Nuuk, gatosan ka mga demonstrador, lakip na si Prime Minister Jens-Frederik Nielsen, ang nagmartsa padulong sa US consulate, bitbit ang ilang mga bandera ug mga banner.
Kahinumduman nga giingon ni Trump nga mahinungdanon ang Greenland sa seguridad sa US tungod sa estratehikong lokasyon ug mga yamang-mineral niini, ug wala niya isalikway ang posibilidad sa paggamit og puwersa sa militar aron makuha kini.
Ang pamahayag ni Trump nagpahinabo og diplomatic crisis tali sa US ug Denmark, nga gikondena usab sa NATO.
Ang Greenland, nga adunay populasyon nga 57,000, dunay dako nga autonomy sukad pa niadtong 1979 apan nagpabilin ubos sa kontrol sa Denmark kon hisgutan ang defense ug foreign policy.
Gibana-bana nga 17,000 ka mga Greenlander ang nagpuyo sa Denmark, ug ang tanang lima ka partido sa parlamento sa Greenland pabor sa pag-angkon og kagawasan sa umaabot, apan mas gipili nila ang magpabilin sa Denmark kaysa mounan sa Amerika.
Photo courtesy: BBC
