Padayon ug walay hunong nga gitutukan sa Iligan City Police Office kun (ICPO) ang kampanya batok sa ilegal nga droga ug ilegal nga sugal dinhi sa Dakbayan sa Iligan, kini ubos sa lig-on nga direktiba ni City Director PCOL Jerry A. Tambis, isip kabahin sa paningkamot sa gobyerno sa pagpanalipod sa kaluwasan ug kaayohan sa katawhan.
Sumala kang PMAJ Zandrex Panolong, Spokesperson sa (ICPO), nga ang kapulisan sa Iligan nagpadayon sa sunod-sunod ug tinuyo nga anti-illegal drug ug anti-illegal gambling operations, lakip ang pagsikop sa mga drug personalities ug mga indibidwal nga nalambigit sa iligal nga pagpanugal sulod sa syudad.
Matod pa ni PMAJ Panolong, bisan dili kanunay ipagawas sa kapulisan ang adlaw-adlaw nga updates sa sugal crackdown, hugot ug aktibo ang implementasyon sa mga balaod batok sa ilegal nga sugal, ilabina kay ang City Government mismo nagpatuman og klaro ug istrikto nga mga direktiba aron masiguro ang disiplina ug kaayohan sa komunidad.
Kabahin na niini ang Executive Order sa syudad nga nagdili sa tanang government workers sa pag-apil sa bisan unsang matang sa gambling activities, ug nagmando sa padayon nga monitoring ug enforcement aron malikayan ang paglapas sa balaod ug mapreserbar ang integridad sa serbisyo publiko.
Padayon usab ang hugot nga koordinasyon sa Iligan City Police Office sa lokal nga panggamhanan ug uban pang ahensya sa gobyerno sa pagmonitor, pagdakop, ug pagreport sa mga indibidwal o grupo nga gitudlong nalambigit sa ilegal nga sugal, isip kabahin sa tinguha sa ICPO nga mapadayon ang malinawon, luwas, ug matarung nga Iligan City.
