Nagpagawas og pahibalo ang Business Permit and Licensing Office (BPLO) sa dakbayan sa Iligan ngadto sa tanang negosyante nga hangtod Enero 31 niining tuiga na lamang ang operasyon sa Business One Stop Shop kun (BOSS) nga nahimutang sa G- Mall ug Robinson’s Place Iligan alang sa pag-renew ug pagkuha sa business permit.
Sumala kang Maria Rhodora D. Omlero, -Division Head sa BPLO-Iligan nga ang mga negosyante nga dili makaapas sa paproseso sulod sa duha ka gitudlo nga area alang sa BOSS mahimong modiretso sa buhatan sa BPLO sa City Hall, kay magpadayon gihapon ang ilang pagdawat sa mga aplikasyon alang sa bag-ong business permit ug renewal bisan human sa Enero 31.
Gipasabot usab ni Omlero nga hangtud karong adlawa lamang Enero 20 ang pag-renew sa business permit nga walay kauban nga penalty, subay sa ordinansa ug mga balaod nga gipatuman sa siyudad.
Human sa maong petsa, ang mga na-ulahi na sa pag-renew posibleng mapatungan og dugang bayrunon.
Bisan pa niini, mipadayag si Omlero sa ilang panghinaut nga mapalapdan pa ang deadline sa renewal nga walay penalty, aron mahatagan og dugang kahigayonan ang mga business owners nga makakompleto sa ilang mga requirements nga walay additional charges.
