Hugot nga gipahayag ni Vice Mayor Greizl Galario-Fernandez nga awtomatikong tanggalon ug dili na ma-renew sa trabaho ang mga Job Order (JO) ug casual employees nga mapamatud-ang positibo sa drug test.
Gipatuman sa City Government of Valencia ang pagpasumiter og drug test result isip usa sa mga rekisito alang sa renewal sa kontrata sa maong mga empleyado. Sumala sa inisyal nga report, adunay 17 ka personnel nga nagpositibo sa paggamit sa ilegal nga droga, diin 14 niini mga Job Order personnel ug 3 mga bag-ong aplikante.
Una nang gipadayag ni Spokesperson Jun Galario nga ang drug-free workplace policy kabahin sa inisyatiba sa lokal nga kagamhanan ubos sa liderato ni Mayor Amie Galario, nga gisusuportahan ni Vice Mayor Greizl Galario-Fernandez ug sa mga konsehal sa syudad.
Tumong niini nga mapalig-on ang integridad, disiplina, ug kredibilidad sa serbisyo publiko, ug masiguro ang usa ka drug-free nga buhatang pang-gobyerno alang sa tanang Valenciano.
Ang lokal nga administrasyon nagpadayag sa determinasyon sa pagsunod sa balaod ug pagpahimulos sa mga polisiya nga nagtabang sa pagpalig-on sa maayong pamatasan sa tanang empleyado sa siyudad.
Photo Courtesy:LGU VALENCIA
