Naalarma ang Provincial Health Office (PHO) Bukidnon sa padayong pagsaka sa kaso sa Human Immunodeficiency Virus (HIV) sa probinsya, ilabina taliwala sa mga minyo nga lalaki.
Matod ni Joseph Marben Gealon, HIV Coordinator sa PHO-Bukidnon, nabantayan ang kausaban sa trend sa transmission sa HIV. Kung kaniadto kasagaran ang mga batan-on ang apektado, karon ang working-age group na ang pinakadaghan nga nagpositibo sa virus.
Dugang pa ni Gealon, usa sa labing makapabalaka nga mga hinungdan mao ang pagsaka sa kaso sa mga minyo nga lalaki nga nakipag-hilawas sa kapwa lalaki nga walay proteksyon, nga nagdugang sa risgo sa transmission sa HIV dili lamang sa ilang kaugalingon kondili usab sa ilang mga kapikas.
Bisan pa niini, gipahayag sa PHO nga ang pagtaas sa naitalang kaso sa HIV dili lang tungod sa aktuwal nga transmission sa virus. Timailhan usab kini sa pagkataas sa kahibalo sa katawhan mahitungod sa HIV, ingon man sa pagdaghan sa HIV testing ug treatment hubs sa nagkalain-laing lugar sa probinsya, nga nagpasayon sa pag-access sa mga serbisyo panglawas.
Sa pinakabag-ong datos, 820 ka kaso sa HIV na ang natala sa Bukidnon alang sa tuig 2025.
Gi-awhag sa PHO ang publiko nga mopailawom sa boluntaryong HIV testing, magpraktis og luwas ug responsable nga pakighilawas, ug dili mahadlok mangayo og tabang. Gibalik-balik sa ahensya nga libre ug kumpidensyal ang mga programa sa gobyerno may kalabotan sa HIV prevention, testing, ug treatment.
Nagpasalig ang PHO-Bukidnon nga magpadayon ang ilang kampanya sa pag-edukar sa komunidad aron mapugngan ang dugang nga paglapad sa HIV sa probinsya.
Photo Courtesy:PHO BUKIDNON
