Gihimakak sa kampo sa kanhing inhinyero sa Department of Public Works and Highways (DPWH) nga si Brice Hernandez ang mga taho nga iyang gibawi ang iyang testimonya bahin sa giingong mga anomalya sa mga proyekto sa pagkontrol sa baha.
Sumala sa iyang abogado, si Atty. Ernest Levanza, ang pangangkon sa pagbawi sa iyang testimonya bakak. Plano nila nga klaruhon ang butang atol sa hearing sa Senate Blue Ribbon Committee sa Enero 19.
Gipasiugda ni Senador Panfilo Lacson, chairman sa Blue Ribbon Committee, nga ang isyu hisgutan atol sa hearing ug nagpasidaan nga bisan kinsa nga mobawi sa gipanumpaang testimonya mahimong mag-atubang og mga kaso sa perjury.
Giklaro usab sa Department of Justice (DOJ) nga wala silay nadawat nga affidavit gikan sa kanhing DPWH Bulacan District Engineer nga si Henry Alcantara nga nagpakita nga iyang gibawi ang iyang mga naunang pahayag. Giingon sa ahensya nga walay bisan usa sa mga counter-affidavit ni Alcantara nga nag-angkon nga iyang gibawi ang iyang naunang testimonya, bisan pa sa iyang nangaging mga paglimod bahin sa gitawag nga “ghost” nga flood control project.
Sa usa ka may kalabutan nga kalamboan, gibawi na sa Professional Regulatory Board of Civil Engineering (PRB-CE) ang lisensya sa civil engineer ni Alcantara tungod sa seryoso nga dili propesyonal ug dili etikal nga pamatasan nga may kalabotan sa giingong mga ghost flood control projects subay sa desisyon sa board diin nakit-ang manubag sa adminsitratibo si Alcantara sa pag-aprobar sa pagpagawas sa pondo alang sa mga ghost projects, base sa DPWH Special Audit Report.
Photo Courtesy: POLITIKO
