Bibo ug madasigon nga gisaulog sa Dakbayan sa Valencia ang ika-25 ka tuig nga Charter Day, diin sa buntag nga bahin sa programa gipasinayaan ang Street Dance Competition nga nagpakita sa nagkadaiyang kultura, produktong agrikultural, ug mga tourist destination sa nagkalain-laing barangay sa dakbayan.
Napuno sa mabulukon nga kasuotan ug nagkalain-laing gamit, ingon man sa indigay nga mga lihok sa sayaw ang mga pasundayag samtang nagpakitang-gilas ang mga partisipanteng cluster, nga nagpadayag sa pagkamamugnaon ug panaghiusa sa mga Valencianos.
Sa iyang mensahe, gipaabot ni Mayor Amie Galario ang dakong pasalamat sa tanang lider ug Valencianos nga nagtinabangay aron mapadayon ang kalampusan sa dakbayan. Iyang gihinumduman nga sa dihang gideklarar ang Valencia isip dakbayan, si kanhi Mayor Jun Galario ang unang City Mayor nga mitindog ug nagbutang sa lig-on nga pundasyon sa cityhood, ug hangtod karon nagpadayon sa pag-alagad isip overall consultant sa administrasyon.
Gipasalamatan usab sa mayor ang 10th Sangguniang Panlungsod sa pagpangulo ni Vice Mayor Greizl Galario-Fernandez alang sa walay puas nga kooperasyon ug aktibong partisipasyon, nga nagpamatuod nga kung naghiusa ang liderato, mas lig-on ug mas klaro ang direksyon sa dakbayan.
Sa gihimong Street Dance Presentation, nahimong kampeon ang Cluster 5, nga gilangkuban sa Barangay Pinatilan, Maapag, Catumbalon, Mabuhay, ug DagatkiDavao samtang sa Ground Presentation, nahimong Champion gihapon ang Cluster 5 nga dunay premyo ₱70,000
Padayon nga gipakita sa selebrasyon nga ang ika-25 ka tuig nga Charter Day sa Dakbayan sa Valencia dili lamang pagsaulog sa numero, kundili usa ka sugilanon sa paningkamot, pagtinabangay, ug paglaum sa tanang Valencianos
