Gipahibalo sa Bureau of Immigration (BI) niadtong Enero 10 nga nasikop nila ang usa ka giingong impostor didto sa Terminal 3 sa Ninoy Aquino International Airport (NAIA).
Giila sa ahensya ang maong impostor nga si Nimo Ahmed Hassan, 21-anyos nga babaye kinsa naghupot sa Swedish passport.
Base sa report, nga misulay matod pa ang akusado sa pagbiya sa Italy pinaagi sa flight sa Qatar Airways sa dihang nakita sa mga opisyal ang mga kalainan sa iyang pasaporte. Gani, gikabutyag ni Immigration Commissioner Joel Anthony Viado nga nasuta nga si Hassan nagkupot ug dili legal nga dokumento kini human sa gilusad sa mga opisyal nga biometric face-referencing technology.
Sa pagkakaron padayon pa ang imbestigasyon sa mga otoridad aron mahibal-an ang iyang tinuod nga pagkatawo ug gidala na usab siya sa holding facility sa BI samtang nag-atubang sa deportation proceedings.
Photo Courtesy: Philippine News Agency
