Milagrosong nakalingkawas ang usa ka 9-anyos nga batang lalaki nga giilang si Willie Myrick gikan sa usa ka insidente sa pagkidnap human siya walay hunong nga nagkanta og gospel song sulod sa pipila ka oras. Nahitabo ang insidente sa southwest Atlanta.
Matod sa awtoridad, nagtindog si Willie sa ilang driveway dihang giduol siya sa usa ka wala mailhing lalaki og kalit nga gipugos pagsakay sa sakyanan. Sa pipila lamang ka segundo, napalayo ang bata gikan sa iyang pamilya ug balay.
Sulod sa tulo ka oras, gituyok-tuyok sa suspek ang bata sa nagkalain-laing lugar sa nasangpit nga syudad. Wala mahibalo si Willie kung asa siya padulong ug kung makabalik pa ba siya sa iyang pamilya. Bisan pa sa kahadlok, nagpabilin ang iyang pagtuo.
Imbis nga mahilom o mosyagit, gisugdan sa bata ang pag-awit sa gospel song nga “Every Praise” ni Hezekiah Walker, lakip niini ang makatandog nga lyrics kalabutan sa pagtoo ug espiritwal.
Padayon niya kining ginakanta bisan pa sa kakapoy ug kahadlok, gumikan mao kini ang naghatag kaniya og kusog ug kalinaw.
Sumala kang Willie, nasuko ang suspek ug balik-balik siyang gisultihan nga mohunong sa pagkanta, apan, wala siya mutuman ug nagpadayon sa pagkanta sa mga pagdayeg sa ginoo. Sa ulahi, niundang ang sakyanan sa East Point ug kalit nga gipagawas sa suspek ang bata.
Gipasidan-an pa siya nga dili mosulti sa nahitabo sa bisan kinsa, dayon midagan ang suspek. Luwas nga nakauli si Willie wala masamdan ug buhi. Misikat ang maong istorya sa iyang kalig-on ug pagtuo sa tibuok Atlanta ug sa ubang bahin sa nasud.
Daghang mga simbahan ug komunidad ang natandog sa iyang kasinatian, nga giila isip usa ka lig-on nga pahinumdom nga bisan ang gamay nga tingog, kung puno sa pagtuo ug paglaum, makahimo og dakong kalainan.
Photo Courtesy: The Sports Dealer
