Gibutyag sa kadumalahan sa Iligan City Police Office (ICPO) nga nakatala ug zero incidence sa stray bullet ug indiscriminate firing ang syudad atol sa pagsugat sa Bag-ong Tuig 2026.
Kini pinaagi sa mga paningkamot ug hugot nga security measures nga gihimo sa kapulisan, diin nagmalampuson ang pagsiguro sa kaluwasan sa mga Iliganon atol sa selebrasyon.
Matod ni Police Major Zandrex Panolong, Spokesperson sa Iligan City Police Office, ang kapulisan sa Iligan disiplinado ug responsable sa pagtuman sa ilang katungdanan isip tigpatuman sa hapsay ug malinawon nga kahimtang sa syudad.
Sa laing bahin, gibutyag usab ni PMAJ Panolong nga niadtong tuig 2025 adunay pagtaas sa insidente sa disgrasya sa kadalanan, nga kasagaran gikalambigitan sa pagmaniho sa motorsiklo nga impluwensyado sa ilimnong makahubog.
Dugang ni Panolong nga ang intervention nga mahatag sa kapulisan mao ang padayong pahimangno ug panawagan sa publiko nga magpakita og responsibilidad sa pagmaniho sa ilang mga sakyanan ug motorsiklo aron malikayan ang disgrasya ug pagkakalas sa kinabuhi.
