Nagtanyag og ₱200,000 nga reward ang Local Government Unit (LGU) sa Valencia City alang sa bisan kinsang makahatag og kasaligan nga impormasyon nga makatumbok sa responsable sa brutal nga pagpatay sa usa ka Grade 10 student. Ang insidente nahitabo sa katubohan nga bahin sa Purok-1 Sinait, Barangay Dagatkidavao.
Sumala ni Jun Galario, spokesperson sa LGU Valencia, inisyal pa lamang ang ₱200,000 nga reward ug posible pa kini mosaka depende sa kahimtang sa kaso. Gidasig usab niya ang katawhan nga dili mahadlok motaho sa mga otoridad aron mahatagan og hustisya ang biktima ug mahunong ang hulga sa komunidad.
“Gusto namo nga ang mga motaho segurado sa ilang seguridad ug protektado ang ilang identidad,” matod pa ni Galario.
Gipahayag usab sa LGU nga usa sa ginatan-aw nga anggulo sa imbestigasyon mao ang posibilidad nga impluwensyado sa ilegal nga droga ang suspek sa paghimo sa maong krimen. Bisan pa niini, padayon ang lawom nga imbestigasyon sa kapulisan aron mapamatud-an ang tanang detalye sa insidente.
Nanawagan ang LGU Valencia sa publiko nga motabang pinaagi sa paghatag og impormasyon ngadto sa kapulisan o sa labing duol nga buhatan sa gobyerno. “Ang inyong kooperasyon makatabang sa paghatag og hustisya sa biktima ug sa kalinaw sa komunidad,” dugang pa ni Galario.
via: VICE MAYOR CECIL GALARIO
