Gipahigayon sa Local Government Unit (LGU) sa Valencia City ang random drug testing sa ilang mga empleyado niadtong Enero 5, 2026, isip kabahin sa padayon nga paningkamot sa administrasyon sa pagpalig-on sa disiplina, integridad, ug kahimsog sa serbisyo publiko.
Kini ang ikaduhang higayon nga gipahigayon ang random drug testing sa mga empleyado sukad sa pagsugod sa administrasyong Galaryo sa kasamtangang termino. Bisan pa niini, matod pa, adunay susamang programa nga gipahigayon sa miaging mga termino sa lokal nga pangagamhanan.
Gipadayag ni Aron A. Rempohito, Information Officer III sa Valencia City Public Information and Assistance Division, nga ang mandatory drug testing required alang sa tanang empleyado, ilabi na sa mga Job Order (JO), tungod kay usa kini ka requisitos sa ilang renewal isip empleyado ug kabahin sa Drug-Free Workplace Policy sa LGU.
Sa miaging random drug testing, gibana-banang kapin sa 2,000 ka empleyado ang nakahuman sa test, lakip na ang mga permanenteng empleyado sa dakbayan. Dugang pa ni Rempohito, pipila ka casual ug Job Order employees ang nagpositibo ug tungod niini, wala na sila nakabalik sa ilang trabaho. Alang sa permanenteng empleyado nga mahimong magpositibo, sila moagi sa rehabilitasyon subay sa balaod, apan kung mosupak sa proseso, posibleng pasakaan sila og kaso nga mosangpot sa pagkatangtang sa trabaho.
Ang impormasyon gipadanggat ni Rempohito sa exclusive interview sa Juander Radyo Malaybalay, diin gipasalig sa LGU Valencia nga magpadayon ang programa aron masiguro ang limpyo, episyente, ug responsableng serbisyo publiko alang sa katawhang Valencianos
Photo Courtesy: LGU VALENCIA
