Hugot nga gipanawagan sa PNP Malaybalay ngadto sa katawhan nga likayan ang sobra ug walay kontrol nga pag-inom, ilabi na sa kagabhion, tungod kay kini kasagaran moresulta sa aksidente sa kalsada, panag-away, ug uban pang disgrasya sa dakbayan.
Gipadayag ni PMSG Keith Hanzel Bughaw, spokesperson sa Malaybalay City Police Station, nga kadaghanan sa mga natala nga insidente sa syudad adunay kalabutan sa pagkahubog tungod sa ilimnon. Matod pa niya, halos matag adlaw adunay mga traffic incident ug panag-away nga nagsugod tungod sa sobra nga pag-inom, ilabi na sa kagabhion.
Sa pikas bahin, gipahinumdoman usab ni PMSG Bughaw ang publiko nga padayon ug hugot ang pagpatuman sa kapulisan sa mga ordinansa ug balaod batok sa “bora-bora” o saba nga tambutso sa mga motorsiklo sulod sa syudad nga makasamok sa kahapsay sa komunidad.
Tungod niini, naghangyo ang PNP Malaybalay sa publiko nga suportahan ang kampanya batok sa bora-bora nga motorsiklo ug motuman sa mga balaod ug lokal nga ordinansa aron mapadayon ang kalinaw ug kahusay sa dakbayan.
Photo Courtesy: PNP MALAYBALAY/ADOBE STOCK
