Giinsister ni Pope Leo XIV nga kinahanglan nga mopatigbabaw ang kaayuhan sa interes sa mga katawhang Venezuelan human mapalagpot si President Nicolas Maduro sa nasud sa usa ka operasyon nga gihimo sa Estados Unidos.
Human sa pag-ampo sa Angelus sa St. Peter’s Square, ang unang Amerikanong Papa miingon nga ang interes sa katawhang Venezuelan kinahanglan nga unahon, labaw sa bisan unsang ubang interes o konsiderasyon.
Sumala sa Santo Papa ang pagbalhin sa gahum sa nasud kinahanglan nga magbukas sa dalan alang sa pagtapos sa kasakit ug pag-uswag sa hustisya ug kalinaw.
Gipasiugda usab niya ang kamahinungdanon sa pagtahod sa soberanya sa Venezuela, pagpatuman sa kasamtangang mga balaod ug sa Konstitusyon, ug pagpanalipod sa mga katungod sa tawo ug sibil sa matag lungsuranon.
Giawhag usab sa Santo Papa ang hiniusa nga aksyon aron pagtukod og malinawon ug lig-on nga kaugmaon alang sa nasud, nga adunay espesyal nga atensyon sa mga kabus nga labing naapektuhan sa grabe nga krisis sa ekonomiya.
Ang pahayag sa papa gipadayag usa ka adlaw human madakpan si Maduro sa Caracas sa mga espesyal nga pwersa sa US.
Agig tubag, si Presidente Donald Trump sa US miingon nga ang Washington ang mangulo sa Venezuela ug mogamit sa mga reserba sa lana sa nasud.
Photo Courtesy: OSV News
