Wala makaabot sa full-year target ang Board of Investments (BOI) sa 2025 human mikunhod ang gi-aprobahang investments sa Php1.56 trillion, 3.7 porsyento ang pagkunhod gikan sa 2024, tungod sa dakong pag-ubos sa foreign investments.
Gipahibalo sa ahensya nga ang 322 ka proyekto ang gi-aprobahan sa 2025, nga mao ang ikaduhang labing taas nga record sa BOI, human sa Php1.62 trillion nga total sa 2024, ug nagpadayon nga nakalapas sa Php1.5 trillion nga milestone sulod sa duha ka sunod nga tuig.
Gilauman nga kini nga mga investment makahatag og 40,175 ka trabaho sa nasud. Sumala ni Trade Secretary Cristina Roque, nga chairman usab sa BOI, ang mga investment nagpalig-on sa paningkamot sa gobyerno sa pagtukod og resilient ug innovation-driven nga ekonomiya, nga nakabase sa sustainability ug inclusive growth.
Ang local investments ang nagdominar, nga nakaabot og Php1.41 trillion o 90.38 porsyento sa total, mas taas sa Php1.23 trillion sa 2024. Samtang ang foreign investments mikunhod og 61.01 porsyento, gikan sa Php383.31 billion sa 2024 ngadto sa Php149.45 billion sa 2025. Ang Singapore mao ang nanguna sa listahan sa foreign investors nga may Php80.37 billion, gisundan sa Netherlands (Php33.29 billion), Thailand (Php7.75 billion), ug United States (Php6.91 billion). Ang Switzerland,nga kaniadto nanguna, mikunhod og 98.5 porsyento ngadto sa Php4.33 billion.
Ang energy projects nag-okupar sa kadaghanan sa approvals, nga naka-total og Php970.09 billion o 62.19 porsyento sa total, apan mas ubos kumpara sa Php1.38 trillion sa 2024. Gisundan kini sa mass housing (Php241.65 billion), transportation ug storage (Php230.06 billion), manufacturing (Php62.16 billion), ug information and communications (Php26.56 billion).
Bisan pa sa pagkunhod sa foreign investments, gipasabot ni Roque nga lig-on gihapon ang pipeline sa BOI sa 2026, ug daghang big-ticket projects nga wala ma-aprobahan sa 2025 posible nga ma-aprobahan na karong tuiga.
Photo Courtesy: Businessworld
