Gilauman sa Bangko Sentral ng Pilipinas (BSP) nga ang average inflation magpabiling kontrolado ug mas ubos sa ilang gitakda nga target nga 2% hangtod 4% alang sa tibuok tuig sa 2025.
Kini human natala ang 1.8% nga inflation niadtong Disyembre sa miaging tuig. Gihimo sa Central Bank ang pamahayag taliwala sa mga bana-bana sa mga international analysts nga posibleng moabot lamang sa tunga-tunga sa 1.6% ug 1.8% ang inflation tungod sa pag-ubos sa presyo sa bugas sa merkado sa kalibutan.
Nagpabiling positibo ang BSP ug giisip nga manageable o makaya ra ang dagan sa inflation sa nasod. Dugang pa niini, gilauman sa Bangko Sentral nga ang ang-ang sa inflation mobalik sa ilang target nga 3.0% (nga adunay margin nga ± 1.0%) sa mga tuig 2026 ug 2027.
Giila usab sa Monetary Board ang nagkahinay nga domestic economic growth outlook, o ang paghinay sa paglambo sa ekonomiya sa Pilipinas. Bisan pa niana, nagpabiling positibo ang Monetary Board sa gilaumang pagbangon sa domestic demand, o ang panginahanglan sa mga produkto ug serbisyo sulod sa nasod.
Sumala pa sa Monetary Board, hapit na mahuman ang kasamtangang monetary policy easing cycle, nga nagpasabot nga hapit na sila mohunong sa pagpaubos sa interest rates.
Photo courtesy: Bangko Sentral ng Pilipinas
