Patay ang helper sa wing van truck human maipit sa nahitabong disgrasya sa may Diversion Road, Purok 20, Barangay Casisang, Malaybalay City, pasado alas 1:50 sa hapon, Enero 6, 2026.
Giila ang biktima nga si Mark Joshua Magalona Josol, 24-anyos, ulitawo, ug residente sa Block 5, Phase 1, Canaynay, Manuyo Dos, Las Piñas City, Metro Manila. Samtang ang drayber naila nga si Eldie Segun Inajenes, 47-anyos, minyo, ug residente usab sa Canaynay Avenue, BF Martinville, Manuyo Dos, Las Piñas City.
Gikabutyag ni Kapitan Gregorio Jaroy sa Barangay Casisang, kinsa maoy unang mirespondi sa nahitaboan, nga giingong ang truck gikan syudad sa Cagayan de Oro paingon unta sa Davao City aron maghatod og cooking oil, apan pag-abot sa maong dapit, kalit kining nawad-an og preno.
Samtang naglugsong, unang nabanggaan sa truck ang usa ka sakyanan ayha kini hingpit nga mibangga sa usa ka dakong punoan sa kahoy nga Gemelina.
Tungod sa kakusog sa impak, maayong pagkaguba sa ulo sa truck diin naipit ang helper nga miresulta sa pagkaputol sa usa ka bahin sa iyang paa nga gidala pa sa Bukidnon Provincial Medical Center (BPMC) apan gideklarang dead on arrival samtang ang driver usab nakaangkon og mga bun-og sa nagkadaiyang bahin sa lawas hinuon luwas na ang kahimtang.
Sa karon, ang driver temporaryo nga gikustodiya sa Malaybalay City Police Station alang sa dugang imbestigasyon.
Nanawagan usab ang mga otoridad ug nagpahimangno sa tanang mga biyahedor nga magmatngon ug kanunayng susihon ang kondisyon sa ilang mga sakyanan aron malikayan ang susamang trahedya.
Photo Courtesy: CDRRMO – Malaybalay City
