Nadakpan sa kapulisan ang duha ka lalaking giingong bag-ong tigpayuhot sa ginadiling droga sa usa ka buy-bust operation nga gipahigayon sa Sitio Quarry, Barangay Malalag Tubing, Sta. Maria, Davao Occidental niadtong nakalabay nga adlaw.
Gipangulohan ang operasyon sa Sta. Maria Municipal Police Station ubos sa pagdumala ni Honor Hibaya, OIC–Chief of Police sa lungsod, diin nasikop ang duha ka suspek human namaligya og ginadiling droga sa usa ka police poseur buyer.
Ang mga dinakpan nailhan nga si alyas Kulot, 25-anyos, residente sa Padada, ug si alyas Mark, 25-anyos, residente sa Malalag, Davao del Sur.
Nakuha gikan sa ilang posisyon ang tulo ka pakete sa gituohang shabu, ₱500.00 nga buy-bust money, mga drug paraphernalia, ug personal nga mga gamit. Sumala sa kapulisan, anaa sa usa ka gramo ang narekober nga droga nga nagkantidad og ₱6,800.00.
Kasong pagsupak sa Comprehensive Dangerous Drugs Act of 2002 ang giandam batok sa mga suspek nga karon detained na sa Sta. Maria Detention Facility.
