Samdan ug nakaangkon og bun-og sa kalawasan ang tulo ka mga biktima human nga nahagbong sa pangpang ang ilang gisakyan nga bao-bao kolor pula sa alas 3:06 sa hapon niadtong nakalabay nga adlaw sa Purok 3, Barangay Motosawa, Dumalinao, Zamboanga del Sur.
Sa inisyal nga imbestigasyon sa kapulisan sa Dumalinao Municipal Police station, ang maong Bao-bao gikan sa Tubod Lakewood Zds ug paingon sa syudad sa Pagadian apan pag-abot sa nasangpit nga dapit nakatagpilaw ang driver niini hinungdan nga misutoy kini paingon sa pang-pang nga bahin.
Dali nga mirescue ang MDRRMO Dumalinao aron matabangan ang mga biktima nga gilangkuban sa 19 ug 11-anyos nga pasahero lakip ang 41-anyos nga lalaki kinsa nakaangkon ug gagmay nga mga bun-og sa nagkadaiyang parte sa lawas.
Samtang ang nasangpit nga sakyanan gidala sa Dumalinao Municipal Police station alang na sa tukmang lakang.
