Gidawat isip tinuod nga bayani sa iyang yutang natawhan ang beteranang Cebuana beach volleyball ace nga si Cherry Ann “Sisi” Rondina human sa iyang pagkadaog og gold medal sa 33rd Southeast Asian Games nga gihimo sa Thailand.
Mipahigayon og courtesy call sa buhatan ni Mayor Felijur “Jury” Quiño si Rondina isip lumad sa lungsod sa Compostela sa amihanang bahin sa Sugbo. Kauban niya ang mga myembro sa Sangguniang Bayan ug ubang lokal nga opisyales.
Dakong garbo sa lungsod ang kalampusan ni Rondina, nga dugay nang nailhan isip usa sa pinakamaayo nga atleta sa beach volleyball sa nasud.
Kauban ang iyang dugay nang ka-partner sa Philippine team nga si Bernadeth Pons, nakuha ni Rondina ang bulawang medalya human nila mapildi ang kusgan kaayong mga koponan sa Thailand.
Gipukan nila sa unang duwa ang walo ka higayon nang defending champions nga sila Worapeerachayakorn Kongphopsarutawadee ug Taravadee Naraphornrapat sa iskor nga 21–17, 21–15.
Tungod sa ilang kadaugan, nahimong kabahin si Rondina ug ang tibuok Philippine women’s beach volleyball team sa kasaysayan isip unang mga Pilipinong atleta nga nakadaog og gold medal sa maong dula sa SEA Games.
Ang kalampusan ni Rondina giila dili lamang isip personal nga kadaugan, kondili usab usa ka dakong inspirasyon alang sa kabatan-onan sa Compostela ug sa tibuok nasud.
Photo Courtesy:CDN Digital
