Gilaraw sa kadagkoan sa Department of Education-Central Visayas kun DepEd Region 7 nga posibleng adunay mga tunghaan nga mas dugay ang closing kun itandi sa uban nga mga tunghaan karon nga school year.
Si DepEd 7 Regional Director, Salustiano Jimenez niingon nga posibleng madugangan og 30 kaadlaw nga school days ang mga tunghaan nga wala gyud nakahimo sa pagklase, bisan sa lain nga modality sa pagtudlo tungod sa epekto sa katalagman dala sa linog ug ingon man sa baha nga nakaapekto sa mga tunghaan sa amihanang bahin sa Sugbo.
Giklaro niini nga angayan nga matuman gayud ang gitakda sa balaod nga 180 ka mga adlaw sa klase sa matag school year. Gipasabot niini nga tungod sa mga katalagman, adunay mga tunghaan nga wa gyud nakahimo sa pagklase bisan sa alternative modality tungod sa epekto sa katalagman.
Matod ni Jimenez nga adunay mga tunghaan nga gibanlas ang mga module ug adunay uban nga dili makahimo sa lain nga modality tungod sa kalisod sa signal sa internet o di ba kaha, adunay mga tinun-an nga walay mga cellphones.
