Gikumpirma ni US President Donald Trump nga iyang gimandoan ang ilang militar sa pag-atake batok sa Islamic State group nga anaa sa amihanang-kasadpan (north-western) nga bahin sa Nigeria dungan sa Pasko.
Giakusahan ni Trump ang grupo nga iyang gitawag nga mga terorista, nga nag-target ug walay kaluoy nga nagpamatay ilabi na sa mga inosenteng Kristiyano.
Sa usa ka pamahayag dungan sa selebrasyon sa holiday sa Pasko sa iyang home estate sa Palm Beach, giingon ni Trump nga naglunsad ang US military og daghang giplanohang pag-atake batok sa Islamic group nga matod pa niya Amerika lang ang makahimo. Dugang niini, ubos sa iyang liderato, dili nila tugotan nga molambo ang radical Islamic terrorism. Nagbahad usab si Trump nga daghan pa ang mosunod kon ipadayon sa Islamic State group ang pagpamatay sa mga Kristiyano.
Base usab sa US Africa Command, gipamatud-an niini ang pag-atake sa utlanan sa Nigeria sa amihanan sa Sokoto state pinaagi sa pakigtambayayong sa mga awtoridad sa Nigeria. Sa inisyal nga assessment, daghang teroristang ISIS ang napatay sa ilang mga kampo.
Gipahayag usab ni Nigerian Foreign Minister Yusuf Maitama Tuggar nga kini usa ka joint operation nga target ang mga terorista ug walay kalabutan sa bisan unsa nga relihiyon. Matod niya, dugay na nga giplano ang operasyon ug migamit sila og intelligence information nga gihatag sa habig sa Nigeria.
Wala usab isalikway sa Punong Ministro nga duna pa’y mga mosunod nga pag-atake depende sa desisyon sa mga lider sa duha ka nasud.
Photo courtesy: Yahoo
